Athanasius Kircher to King Frederik III of Denmark, from Rome, 18 March 1655

holograph, transcribed by Noel Malcolm

(Rigsarkiv, Copenhagen, T.K.U.A., Alm. del., Breve fra laerde maend, Litra K., Pk 57, 18/3 1655)

Serenissime atq[ue] Inuictissime Rex

Appulit iam dudum in Vrbem Excell.^mus D. Baro Güldenloëw, qui, uti summa modestia, inculpatâ morum pietate, vitaeq[ue] innocentia, una cum familia sua praelucet omnibus; ita meritò, nescio quo uirtutis adeò spendidae magnetismo, non inferioris duntaxat ordinis virorum; sed et ipsorummet Romanorum Procerum (non sine tantorum reflexione radiorum, qui in cumulatissimum de S. M. V.^ra conceptae existimationis augmentum resultant) efficaciter trahit. Vnde ijs in hoc orbis theatro affectus honoribus fulget, quos et dignitas eius, et auitae prosapiae splendor iure suo postulare uident[ur]. Nec minori prudentia et dexteritate, in eius se cura gerit eiusdem moderator D. Tot; adeoq[ue] non parum S. M. V^m congratulor, de istiusmodi in tanta indole egregie imo regie educanda magistro. Ego tametsi non nisi obscura fortassis fama S. M^ti V^rae notus, in mathematicis, caeterisq[ue] curiosioribus disciplinis, non quantum debeo, sed quantum possum eundem pro uiribus erudire contendo, [ad id?] non tam requisitus, quam uel ultrò ad tam eximiae uirtutis frugem maturandam, attractus. Interim quuquid [sic] generosissimae indoli á mea tenuitate impenditur operae parum id, fateor, est, si cum meritis S. M^ti V^rae nulla temporum obliuione delendis ritè conferatur. Vndè certò sibi persuasum habeat, nihil esse, quod magis cupiam, quam occasionem mihi quampiam suppeditari, qua dilucidè meam in Te potentissime Rex, fidem, amorem et obseruantiam tester. Quibus quidem si de meae exiguitate personae periculum aliquando facere dignabitur, tanto inter eos, qui S. M. V.^rae seruitio addicti sunt, superiorem me esse cognoscet; quanto S. M. V^r inter sui similes uirtute et doctrina mirum in modum antecellit. Deniq[ue] Deum Opt. Max. obnixè precor, ut S. M. V^m caelestibus donis ornet, potentiae suae dextra protegat, ut bono eam publico, et Reip. Lit. emolumento longaeuos in annos superesse, gaudeamus.

Romae 18 Martij 1655

Inuictissimae M.^tis V^rae

Seruus humillimus

Athanasius Kircher,

[MP?]